NGAIZAWL KHUAAH GRAM SABHA BUATSAIH A NI.

                   Ngaizawl khua hi Khawzawl District, Khawzawl RD Block chhunga awm niin, District Headquarters atanga KM 20 a hla a awm a ni a. Tunah hian chhungkua 195  an awm mek a, khaw taima leh hnathawk nasa, a bikin Vaimim (Maize) thar chhuak tam ti a hriat lar an ni.

                   Khaw taima leh Vaimim chin tuipui tak an nih avang hian khawtlang hruaitute leh Khawzawl RD Block chuan awmze nei leh hlawk zawk a kalpui a nih theihna turin hma an la a. Tahrik ni 3 Mimkut thla, 2022 khan Community Hall-ah Vantlang rorel inkhawm (Gram Sabha) neih a ni a. Hetah hian Block Office a thawk ten MGNREGA hnuaia hnathawh theih te leh a kalphung te, Mz-SRLM hnuaia hmalakna te hrilhfiah a, inzirtirna hun an hmang a ni.

                   He Vantlang rorel inkhawm (Gram Sabha) hian Ngaizawl khuaah a Zau (Compact Area) a Vaimim chin kalpui turin lungrual takin thu tihtluk a ni a. A chinna hmun tur buatsaih leh kut hnathawktute mamawh tur ang buaipui te, hna vil zui te leh a thar chhuahte thil dang tangkai zawka sawngbawl te chu MGNREGS leh Mz-SRLM tangkawpa thawh turin ruahmanna siam a ni bawk. Chhungkua 195 atangin 62 te chu Zau khat (Compact Area) a Vaimim ching turin thlan chhuah nghal an ni bawk.

                   Hetianga ram (Zau) bawh bik neia Lo neih hian kut hnathawk tute eizawnna ngialnghet nei turin a puih ngei beisei a nih mai bakah Tlangram Lo neih bansan a, Lo/Huan ram nghet nei a eizawnna nghet leh tlo, chhenfakawm tak an neih theihna tur atan ruahmanna siam a, hma lak chhoh mek a ni.